E ui lava ua sinasina ma touulu laulu o nisi, ae o le afi i le fia tauva o loo faaauau ona sasao i nisi o tama tuai o le aulakapi a le Blues sa manumalo i le siamupini o le Supa Lakapi.
O se vaega o tama tuai sa talimalo i se taumafataga o le taeao i le nofoaga o toleniga i Epsom i Aukilani i le taeao o le Aso Lua, ia John Afoa, Charles Riechelmann, Brad Mika ma Doug Howlett, ua taufai sauniuni mo le taaloga i le po o le Aso Toonai ma le Crusaders, lea ua fā taaloga, fā faia’ina, i le malae i Eden Park.
O nei tama tuai, sa auai faatasi atu i tama taaalo o le 2024 ma le vaega o faiaoga, mo le tufa fua iai o le atamai, a o tilotilo le Blues o loo tulaga fā i le taimi nei mo le faaleleia atili o faamaumauga o ana taaloga i le faaiuga o le vaiaso.
Faaalia e Afoa, o se taaloga tele mo Aukilani ma tama taaalo.
O Afoa, e 22 tausaga o taalo lakapi faapolofesa, lea sa faaiuina i le tausaga talu ai ina ua toe taliu mai ma taalo mo ni taaloga mo le Crusaders.
O Afoa, o se tasi o le vaega maualuga o le numera o tama taaalo faavaomalo, sa taaalo uma i nei ‘au e lua, le Crusaders ma le Blues, faatasi ai ma Mika, Caleb Ralph, Rico Gear, Ron Cribb ma Ali Williams.
O Mika, sa manumalo i siamupini o le supa lakapi i ‘au uma e lua i le 2002 ma le 2003, sa ia faamanino le ‘au e ave iai lana lagolago, o le Blues.
Ae o le loka muamua ia Riechelmann, sa avea ma vaega o le Blues sa manumalo i le Supa Lakapi 12 i le 1996 ma le 1997, e manatu, e lē tatau i le Blues ona tilotilo māmā i le fā o faia’ina a le Crusaders.
