E ui e le’i manuia taumafaiga a le alii fusu Samoa ia Laauli Lupesoliai Joseph Parker i le faaiuga o le vaiaso lea na malolo ai i le la taaloga ma Joe Joyce, ae e le o faavaivai ai Parker ma faailoa ua sauni e toe foi i ana toleniga masani. 

O lea taaloga sa faia i Manchester AO Arena na lavea i se tu’i oti (knockout) i le taamilosaga lona 11 mai taamilosaga e 12 o le taaloga. 

E talitonu nisi ua oo i le taimi e litaea ai lea alii mai faipelega peitai na ta’ua e le faauluuluga a le BOXXER Ben Shalom o le a tele nisi avanoa tetele o le a maua e Parker i le mae’a ai o lea fusuaga, e le gata i lea o le a tele foi ni ana seleni e maua i nisi fusuaga e talosaga ai. 

Ta’ua e Parker i se faatalatalanoaga ma tusitala i luga o le Newshub i le mae’a ai o lea taaloga, o le a sauni e toe foi i ana toleniga ma taumafai e toleni malosi. E fai si malosi o lana paga lea na la feiloai i le faaiuga o le vaiaso ae e le o le mutaaga lea o lona olaga taalo i le taaloga o le faipelega.