O le masina fou lea ua lipotia o le a toe foi ai i Ukraine le Amepasa o Ausetalia i Ukraine i le mae’a o le lata i le 3 tausaga o le taua i le va o Lusia ma Ukraine lea na aveesea uma mai ai ma le aufaigaluega a le ofisa lea o le Amepasa o Ausetalia i lea atunuu.
O le folafolaga lea na faia mai e le minisita o le va i fafo o Penny Wong ma ia ta’ua ai o le faatinoina o lea tulaga ma lona foi asiasi atu i Ukraine ua faia i se taimi tāua mo Ukraine aemaise lo latou lumana’i e ui i le tele o le mau aafiaga e pei foi o le filifilia o le Peresetene fou o Amerika o Donald Trump.
Ta’ua e Wong o le Amepasa o Ausetalia o Paul Lehmann o le a toe taliu atu la i le laumua o Ukraine i le masina fou e tapena ai le toe tatalaina o le embassy a Ausetalia i lea atunuu.
Ua faamanino e Wong o loo tu Ausetalia mo Ukraine ma ua mana’omia ona faamuta loa le taua o loo faia ina ia mafai ona toe nofo filemu Ukraine ma toe fausia soifuaga o aiga i o latou lava laueleele.
Puna o Faamatalaga: https://www.9news.com.au/world/russia-ukraine-update-australian-embassy-in-kyiv-to-reopen-after-ambassador-paul-lehmann-returns/8cce68a8-9f64-40d5-a40e-ec28dc6d6152
