Ua folafola e le minisita o le puipuiga a Isaraelu le faia o nisi o osofa’iga ua faasaga tonu lava i le aufaatupu faalavelave o loo nonofo i le West Bank a o lapata’i mai ai sui o Palesitina i le tula’i mai o se faalavelave tele sa faatino e tagata.

O loo ta’ua i le lipoti a le CNN le faaaogā e Isaraelu o lesona na maua mai i le taua i Gaza e faafoe ai osofa’iga fou ua faia nei i le West Bank e aga’i sao lava i le faamutaina o faiga faatupu faalavelave ma ia tafiesea.

O le operation lea a Isaraelu e faaigoa o le Iron Wall poo le Puipui Uamea ua faia i le faaitu o Jenin ma ua faatino lava ina ia faamautinoa e lē toe iai ni faiga faatupu faalavelave e toe alia’e pe a mae’a lea osofa’iga.

Ua vaaia ata o pa ua faaleagaina aemaise magāala ua tumu i mea ua faaleagaina ma ua faamatala foi e leoleo mai Palesitina le faaleagaina o falema’i ma nofoaga e lalata ane ma ua popole le to’atele o le vaaiga o loo iai Gaza i le taimi nei o le vaaiga foi lea o le a oo iai le West Bank ona o osofa’iga a Isaraelu.

A itiiti mai pe ā ma le 851 tagata Palesitina ua fasiotia e vaega’au a Isaraelu i le West Bank talu mai Oketopa 2023 ma e aofia ai ma tamaiti e 173 i lea numera.

Ua molimau ai se tasi o tagata faigaluega a le vaega o le auaunaga tau soifua mālōlōina a Palesitina e faamautū i Ramallah e faapea o le nofo o le tagata i le West Bank i le taimi nei ua tai pei o le nofo i se falepuipui o loo matala.

Ua valaau nisi o minisita a Isaraelu ina ia ave faamalosi loa e Isaraelu vaega poo faaitu uma o le West Bank ma ua lipotia o loo lagolago foi lea manatu e nisi o sui faatutū a Trump mo lana faigamalo ma o loo talitalia se isi lipoti mai lea faaitu o le lalolagi.

Puna o Faamatalaga: https://edition.cnn.com/2025/01/22/middleeast/israel-west-bank-gaza-war-katz-intl/index.html