E silia i le miliona 200 afe tala le fesoasoani tupe mai le polokalame o le atina’e a le Malo o Amerika ua faamatuu i le polokalame fesoasoani a le Ekalesia Aso Fitu o le Toe Afio Mai ua ta’ua o le ADRA, e faia ai polokalame mo aiga limavaivai e tali atu ai i aafiaga o suiga o le tau, ma unaia ai le tamaoaiga o ia aiga e maualalo tupe maua poo le lē tagolima foi.
Ua tuusa’o foi lenei fesoasoani a le Malo Amerika o le a faatino e le ADRA i aiga ua tuulafoaina, tagata e iai manaoga tumau e saili auala e toe tapu’e ai lo latou ola atina’e i faatoaga, ma tetee atu i sauaga, ma faaleleia lo latou tamaoaiga, ma saili foi auala e maua ai le laveai mai mala faalenatura.
O fesoasoani tupe a le Malo Amerika o se polokalame e faia i totonu o le lima tausaga, ma e agavaa ai faalapotopotoga o loo faia galuega lelei mo isi tagata.
E le gata i Samoa o loo aofia i le fesoasoani ae faapea foi isi atunuu o le Pasefika.
