E lei maua lava e leoleo le alii lea o loo tuua’ia i le taumafai e ave faamalosi se tamaitai ma sana pepe mai se kapaka o se taulaga faatau i Melepone i le vaiaso na te’a nei.

Fai mai le 9News o le faamatalaga mai leoleo e lei iai se tasi na faamanu’alia ae o le faamatalaga e faapea o le tamaitai sa agai atu iai se alii ma faafefe i se naifi i le kapaka a le taulaga faatau ma fosi ai i totonu o lana taavale o le Suzuki.

O le alii na faatinoina le osofaiga sa nofo i le nofoa pito i tua o le taavale faatasi ma le pepe a le tamaitai a o lei ia faamalosia le tamaitai ina ia ave le taavale agai i se faleoloa i le South Gippsland Highway i Cranbourne faapea ma Dandenong.

Na ia faatonu le tamaitai ia faatau ane AppleMacbooks mai faleoloa ia a o faatali ia ma le pepe i le taavale.

Mulimuli ane na sola ese ai ma Macbooks ia e fā na faatau e le tamaitai e tusa lea o le te’a o le 8 i le po o le Aso Faraile talu ai.

O loo manuia le tamaitai ma lana pepe ae ua faailoa o le alii na faatinoina lenei gaioiga o se tagata Asia pe ā ma le va o le 20-35 tausaga le matua ma o loo faaauau pea ona su’e e leoleo.

Puna o Faamatalaga: https://www.9news.com.au/national/rowville-woman-and-baby-safe-after-abduction-from-melbourne-car-park/d2737edd-45f0-41ab-8e08-ad1969532275