Ua tai pei foi o taimi o talitalia taaloga a le Toa Samoa le vaaiga na iai le taeao analeila i Ausetalia nei i le anoano o tagata na molimauina ma tapuaia le alofaiva le ausoka a Ausetalia le Socceroos i le la taaloga ma Denmark lea na manumalo ai i le tasi i le leai.
Na faatumulia nisi o nofoaga i Sini faapea foi isi setete o Ausetalia ua faatasitasi ai le autapuai e tapuaia taumafaiga a le Soccceroos.
O lea la ua sao atu i le isi round o le taamilosaga ma ua faamaonia o le a taaalo ma le isi ‘au malosi o le taamilosaga o Argentina.
O le alii o Matthew Leckie na mauaina le sikoa mo Ausetalia ma ua tapenapena foi le ‘au mo le taaloga lea i le Aso Sa nei.
E ui ailoga a faia ni solo poo ni parade a le autapuai a Ausetalia ae ua faailoa e nisi o le aumaimoa o le a faamautu foi nofoaga o tapuaiga auā o le na o le faalua ai lea o taimi ua oo ai le Socceroos i lea tulaga ma afai ae malo o lona uiga o le uluai taimi foi lea o le a ausia ai e Ausetalia lea tulaga i lea faagatama.
