O le taaloga o le taamilosaga o le Super Rugby Pacific a le Moana Pasifika ma le Queensland Reds, na maimoaina ai e le atunuu aemaise o tauaiga o le alii o Jordan Petaia o le Reds lana taaloga lona 50, ma maua ai le avanoa e tauaao e se tasi o lona aiga le pulou e pine faamau ai lea numera tele o ana taaloga ua ia ausia mo lea ‘au malosi o le taamilosaga o loo faagasolo.
Ae o le taaloga lava ia i le faaiuga o le vaiaso, sa maualuga le tapuaiga a le atunuu e maua se manumalo o le Moana Pasifika peitai e iai le talitonuga, ua leva ona masani le Reds ma le malosi o ave o le la o le tau vevela i Kuiniselani, fua ina matuā malosi lana osofai ma manumalo ai i ai e 40 ae 28 mo le Moana Pasifika.
E ui ina faaauau pea ona malolo le Moana Pasifika ae sa molimauina le laufofoga fiafia o le pulega ma le ‘au atoa, ona ua faamalieina i le talimalo a Samoa i le lagolago a le toatele sa maimoaina le taaloga, aemaise o se vaega foi o le atunuu sa laeiina le lanu mumu e lagolago ai le Queensland Reds. O loo talosia ia toe faia mai i Samoa se isi taaloga a le Moana Pasifika i le taamilosaga o le tausaga fou.
