Ua patipatia nei e le kalapu o le Moana Pasifika lo latou sainia ai o se tasi o alii taalo lakapi mai Ausetalia, le alii o Pone Faamausili.
O Pone o se alii Samoa, e mai afioaga o Malie ma Vailoa Palauli, 27 tausaga le matua ma o se tasi ua iloga lona tula’i mai i le taaloga i totonu o Ausetalia.
Na amata taalo faapolofesa mo le kalapu o le Rebels i le tausaga 2018 ina ua mae’a taaloga na auai ai, le National Rugby Championship.
E fitu taaloga faavaomalo na taalo ai Pone mo le ‘au tele a Ausetalia poo test matches e aofia ai ma taaloga o le Ipu o le Lalolagi i le tausaga 2023.
Ta’ua e le alii taalo, ona lagona fiafia i le maua ai o le avanoa e taalo ai mo le ‘au o le Moana Pasifika, o le a mafai ona ia faaaogā ai lona tomai ma le agavaa i le faatinoina o le taaloga o le lakapi.
Faaalia e le alii faia’oga ulu o le Moana Pasifika ia Faalogo Tana Umaga lona fiafia tele i le mafai ona ofi mai o Pone Faamausili i le aulakapi ma na ia ta’ua o Pone o se tagata e taalo malosi ma e telē foi lona silafia i le taaloga.
Puna o Faamatalaga: https://moanapasifika.co.nz/faamausili-signs-with-moana…/
