O le aiga o se tamaititi e 16 tausaga na uma lona ola a o iai i le vaaiga a leoleo i se nofoaga faasala mo talavou ua valaau nei mo se taui e faitau miliona mai le faigamalo a Western Australia, a o faagasolo ai se molimau a se tasi o pule o le nofoaga na taofia ai le talavou ma ia faailoa ai lona lē lagolagoina o le faiga lea o le tuuina o talavou i totonu o sela mo le ta’i 16 itula i le aso.
O Cleveland Dodd na uma lona ola i le falema’i toeitiiti atoa le tausaga talu ai ina ua ia taumafai e faaoo ni manu’aga ia te ia lava i totonu o le sela na loka ai i Perth.
Ua malaga atu lona aiga e auai i le iloiloga o loo faagasolo nei e faatatau i le mafuaaga o lona maliu ma o loo aofia ai ma nai ona mātua.
I fafo mai o le faamasinoga na faailoa ai e se sui o le aiga e tatau ona maua e le aiga se fesoasoani tau tupe mai le malo ma ua fai si umi o lenei mataupu o le a atoa le tausaga ae lē faigofie mo le aiga.
Fai mai lipoti a le ABC o loo galulue loia a le aiga e sailia se isi peimeni i le mataupu lea ae faailoa foi e se sooupu a le matagaluega o Faamasinoga e lē masani ai ona saunia e le matagaluega se nofoaga e nonofo ai se aiga ma tuuina le lagolago iai a o faatino se iloiloga o se mataupu.
Ua faailoa i le lipoti sa fesoasoani le matagaluega o faamasinoga i feoa’iga ma se nofoaga sa aumau ai le aiga o lē ua maliu a o faatino le vaega muamua o ia iloiloga ona o le aiga e lē nonofo i Perth.
Puna o Faamatalaga: https://www.abc.net.au/news/2024-10-08/cleveland-dodd-family-compensation-payment-plea/104444432
