O le faamoemoega autu ma le fuafuaga o lenei auaunaga alofa, ina ia maua pea le fesoasoani faaauau i vala eseese e puipuia ai nai fanau faapea foi tina, o loo aafia i sauaga i totonu o latou aiga, ma ua aafia ai o latou tino ma mafaufau.
E le o toe po malaē i le telē o le sao o lenei faalapotopotoga, le Toomaga o ē Puapuagatia poo le Samoa Victim Support Group (SVSG) i alo ma fanau o Samoa faapea tina ma tamaitai o loo aafia i sauaga, ma talu mai ona faatuina lenei faalapotopotoga, ua toatele alo ma fanau o le atunuu ua faasaoina mai ai o latou ola mai aafiaga na aafia ai.
O se auaunaga e lē totogia pe a sulufai atu i ai se tasi mo se maluapapa, ma o le ala lea e faaauau ai pea sailiga seleni a le Toomaga e le gata i totonu lava o Samoa, ae faapea i atunuu i fafo o loo toatele foi i latou o loo faaleo le agaga fia lagolago i lenei auaunaga alofa.
E tele polokalame faalauiloa o loo faamaite e le Toomaga, e le gata i a’oa’oga e faagasolo i a’oga, ae faapea i nuu ma afioaga i le taumafai lava e momoli le feau tāua, ia tafiesea sauaiga mai aiga, nuu ma afioaga.
O le faalapotopotoga foi lenei o loo tele ina galulue soosootau’au ma le matagaluega o leoleo, ina faailoaina o le tele o soligatulafono o loo aafia ai fanau ma tina mai o latou aiga.
E pei foi ona silafia ona o le tele o i’uga lelei ma le mautinoa o taunuuga aogā o loo maua mai le auaunaga a le Toomaga, ua mafai ai foi ona aapa atu le Malo e foai atu se vaega tupe e lagolago atili ai galuega faatino a lenei faalapotopotoga, peitai e tele pea galuega e fia faaleleia atili ai a latou polokalame faagasolo, o le ala lea e le o faalagolago tasi i le Malo, ae o loo tauivi foi latou e saili ma tagisia le fesoasoani a soo se tasi e iai le agaga e fia lagolago i lenei faama’ite alofa mo alo ma fanau aemaise tina ua sauaina ma ua lē malu i totonu o o latou lava aiga, ae ua avea lava lenei auaunaga ma sulufaiga e mapu i ai le tagata mafatia.
E toatele foi nisi o le mamalu o le atunuu ua ofo fua o latou taimi ma tomai e fesoasoani ai i le galuega a le Toomaga, ona ua latou talitonu i le moni o le tautua o loo faatino, ma o se tasi lea o vaega o le sailiga seleni o loo faagasolo, ina ia maua se fesoasoani e tuuina atu ia i latou ua ofo fua o latou taimi, ae tau o sina sene e pasese ai pe utu ai le penisini o a latou taavale.
O lea ua tagisia ai soo se foai tau seleni e mafai ona ma’au i ai le atunuu, e teu atu ia latou teugatupe i le Bank of New Zealand numera o le tusitupe, 02-0232-0110831-002, le Give a Little Page ua faaigoaina o le SVG Online Fundraising 2023, pe lafo sa’o lava lau seleni i se lala o le Pacific Ezy Money Transfer ma faailoa iai le suafa o Mrs Vitolina Chang, o ia o le Ofisa Sili o le Toomaga poo le Samoa Victim Support Group.
Ina ia malamalama atili le atunuu i le tele o polokalame faagasolo o loo faia e le Samoa Victim Support Group, o loo iai le latou upega tafailagi e te silasila iai, le svsg.org.ws
