Ua faailoa nei e le Ofisa Sili o le pulega o le Lakapi Samoa le susuga Faleomavaega Vincent Fepuleai i se lipoti a le nusipepa o le Sunday Samoan, le avanoa ai o le tofiga o le faiaoga ulu o le aulakapi ta’itoafitu o le Manu Samoa, ina ua faamuta i se faai’uga a le komiti faafoe o le Lakapi Samoa le konekarate a le afioga Muliagatele Fata Brian Lima sa avea ma faiaogaulu.
O se faai’uga ua faamuta ai foi ma isi tofiga o le pulega o lea aulakapi a le atunuu i le faai’uga lava a le komiti faafoe na faia i le aso 12 o Iuni, a o tapena le aulakapi ta’itoafitu a le Manu Samoa i taaloga a le Olimipeka.
Ua faaalia e le Ofisa Sili i lea lipoti e lē o iai se fuafuaga faanatinati i le taimi nei e faasalalau loa le avanoa mo se faiaogaulu, peitai o le itu mautinoa e tatau ona oo atu ia Novema i le taimi o le taamilosaga lakapi ta’itoafitu a atunuu o le Oceania, ua maua se faia’oga.
I se tasi o tala mai le taaloga lakapi o le afiafi o le Aso Gafua o lenei vaiaso fou, o le a tuua ai le atunuu e le tatou aulakapi tele o le Manu Samoa mo lana ulua’i taaloga o le taamilosaga o le Ipu o le Pasefika, lea o le a taaalo ai ma Fiti i le faai’uga o le vaiaso nei.
O le mae’a o lea taaloga ona toe taliu mai lea i fanua e sauniuni ai mo le taaloga ma le ‘au o le Ikaletahi a Tonga, ma o le a faia lea taaloga i lo tatou atunuu.
