Ua faailoa e le ofisa o le malo o Iapani i Samoa le filifilia o se alo o le tatou atunuu i se avanoa sikolasipi ua ofo mai e le matāgaluega o a’oga, aganuu, taaloga, faasaienisi ma tomai faatekonolosi a lea malo, mo le su’eina o le faailoga o le Master Degree in Urban Environmental Engineering, i le Iunivesite o Kyoto i Iapani.
Ua filifilia le susuga Arthur Vansan Tofaaiga Fesili i lea avanoa sikolasipi ma o ia o se tamafanau a Samoa ua 28 tausaga o le soifua ma o loo ia umia le faailoga o le Bachelor of Engineering in Chemical and Materials Engineering mai le Iunivesite o Aukilani i Niu Sila.
Faaalia e le ofisa o le malo o Iapani i Apia o le a autū a’oa’oga a lea alo o le atunuu i le su’esu’eina o vai ua lafoa’i poo waste water ma ni a’oga o iai mo faato’aga.
O le Aso Tofi na tuuina atu ai aloa’ia lea avanoa sikolasipi i se sauniga na momoli ai ma faamanuiaga a le Amepasa o Iapani i Samoa ina ia manuia le taumafai o Arthur i le su’eina o lona faailoga.
