E foliga ua liliu pulega o aai poo Councils agai i atamai tau komepiuta poo le artificial intelligence poo le AI e maua ai se tali o le faafitauli o le faatuai o le fausiga o fale.

Fai mai lipoti a le ABC o loo iai se polokalame a le malo o loo faagaioia e agai sa’o i le faafitauli lea ae faaaogā ai le ituaiga atamai lea tau komepiuta.

O le taimi nei o loo feagai le setete o Niu Sa Uelese ma isi setete o Ausetalia ma le faafitauli lea o le faatuai le fausia o fale aemaise foi o le tuai o le faagaioia o le faiga o maliega tau i le fausiaina o fale.

O le NSW Planning minister o Paul Scully sa ia faailoa i sana saunoaga i se taimi ua sola sa faailoa atu ia te ia e leai se avanoa e mafai ai ona ausia faamoemoega o loo iai mo le fausiaina o fale i le setete se’i vagana ua faaaogā le AI technology.

E lē o iai se faamalamalaga auiliili o faailoa mai o lea faiga ae toatele i latou atamamai i lea matata latou te ioeina ia faamatalaga.

Ua faailoa la e le faigamalo a NSW i le lipoti lea ua amata nei polokalame faaleaoaoga i le faaaogāina o le AI ma o le a faafofogaina finagalo faaalia iai o tagata i le masina lava lenei o Fepuari.