O loo saili nei e leoleo Niu Sila le aveesea o tulaga o loo puipuia ma lē mafai ai ona faia ni moliaga i le paaga a se tasi o tagata Ausetalia, o se sui o le malo, diplomat o loo feta’ua’ina na aafia i se vevesi i Ueligitone i le taeao o le Aso Sa na te’a nei.

Fai mai le Newstalk o se faamatalaga mai le sooupu a leoleo e tauala i se pepa o faamatalaga ua faamaonia ai e tasi le tagata na o latou taofia i le mae’a o lea vevesi e to’atolu tagata na aafia ai i Dixon St i Ueligitone i le vaveao o le Aso Sa, i le mae’a mai o taaloga a le All Blacks ma le Wallabies na faia ai.

E talitonuina o le tagata lea o le paaga a se sui o le malo o Ausetalia e pei ona faailoa ma o loo sailia ai nei la e leoleo se ioega e aveesea ai puipuiga faalemalo o loo noatia ai le mafai ona faia o ni moliaga i lē na taofia, fai mai le lipoti ua faailoa ane se pepa o faamatalaga mai le matagaluega o le va i fafo ma fefaataua’iga ua ta’ua ai ua silafia lea mataupu ma o se mataupu e feagai ma leoleo.

Faailoa foi i lea pepa o faamatalaga e manatu le matagaluega o sui foi o malo mai fafo e ao ona usitaia le tulafono a Niu Sila pei foi ona faia e sui o le malo Niu Sila i soo se atunuu o loo galulue ai.

O diplomatic immunity lea e puipuia ai sui o malo o lona uiga e lē mafai ona pu’eina pe taofia pe faasala foi i le tulafono se’i vaganā ni faasalaga tau taavale.

Ua faailoa e le matagaluega o le va i fafo a Niu Sila, se’i vaganā la ua aveesea e le Malo e ana lona sui, lea tulaga (immunity) ona faato’ā mafai lea ona faatino ni moliaga pe ave foi sea tagata i le tulafono.

Puna o Faamatalaga: https://www.newstalkzb.co.nz/news/politics/police-seeking-waiver-to-charge-partner-of-australian-diplomat-after-330am-altercation/