O loo faia suesuega a leoleo i le fia maua o se aupega e faapea o se fana laitiiti lea o loo masalomia na faamanu’alia ai le ulu o se tamaitai tausi soifua.

O suesuega i lenei mataupu ua faailoa ai e le sui Komesina le susuga Papalii Monalisa Tia’i Keti i se lipoti a le nusipepa o le Samoa Observer, ua ta’utino atu i leoleo lē na faamanu’alia o ia lava na faatupuina lona manu’a sa ia faaaogā ai le laau malosi o loo tau saili poo ai ua ave iai.

Ua faailoa e le sui komesina i lea lipoti o le tala a le tausi soifua o le fana o se meatotino a lona toalua, lea o loo molia i se solitulafono tau nakoti poo fualaau faasāina.

O le sailiga o le laau malosi e ono molia ai le toalua o le tausi soifua ona e lē faatagaina lea ituaiga o fana ona umia e se tagata i Samoa.

O le vaiaso na te’a nei na faailoa ai e leoleo le faia o se suesuega i le aafia o se tina le tausi soifua, i se laau malosi.

Na logo e le falemai leoleo i le faalavelave ina ua taunuu atu se taxi ma ni alii se toalua na la ave faanatinati lē na faamanu’alia i le fana i le falemai mo togafitiga.

Sa faailoa e leoleo i le taimi lea o loo masalomia o se mataupu tau lotoifale faaleaiga le mafuaaga.

O suesuega o loo faaauau pea o le a iloa ai le molia o le toalua o le tina na aafia i le laau malosi i se moliaga e fesootai i le vevesi faalotoifale i lo la aiga poo se domestic violence.