O se alii mai Whangarei lea ua pu’e e leoleo ona o le mu o se fale ua maliu ai le tagata e 61 tausaga e suafa ia John Reuben.
Fai mai le RNZ o lea faalavelave na feta’ua’ina na amata atu le afi i le taavale, sosolo atu ai i lona fale i Thomas St i le faaitu o Tikipunga i le aso 29 o Aperila.
Talu mai ona mae’a lea faalavelave sa faatino suesuega ma aoao e leoleo faamaumauga mai lea nofoaga faapea foi ata mai le CCTV.
O pepa la mai le faamasinoga i le asō ua faailoa ai e 48 tausaga o se alii mai Otangarei o August Lemon, na pu’eina i le vaiaso nei ma tula’i i le faamasinoga i le aso ananafi, ua molia i le tuuina o se soifua i se tulaga lamatia e ala i le susunuina o se fale.
O le faasalaga aupito maualuga o lea moliaga e 14 tausaga i le falepuipui.
Ua toe taofia nei Lemon i le vaaiga a leoleo seia toe tula’i i le faamasinoga i Whangarei lava i le aso 16 o Setema.
Puna o Faamatalaga: https://www.rnz.co.nz/news/national/525759/tikipunga-house-fire-man-arrested-following-fatal-blaze
