Ua faailoa nei e le ofisa o le malo o Amerika i Apia le mae’a o le taimi galue o le sui o lea Malo mo Samoa le alii Amepasa o Tom Udall e faamautū i Niu Sila, peitai o le fuafuaga a lea Malo na faailoa e le Amepasa ua mae’a lona taimi, o le a iai se Amepasa o Amerika e faamautū i Samoa, e oo mai i le taimi nei e le’i faatinoina lava lea fuafuaga.
O Iulai o le tausaga na te’a nei na faailoa ai e Tom Udall le iai lava o se sui o lona malo mo Samoa ina ua faailoga le tuto’atasi o le Iunaite Setete i le aso 4 o Iulai o le tausaga ua mavae.
O lona tuua o le tofiga ina ua mae’a lona taimi galue ua ia faafetai ai i ta’ita’i o le Malo o Samoa i le galulue faatasi ma lona malo i le tele o polokalame ma fuafuaga.
Na filifilia o ia e avea ma Amepasa o lona malo mo Samoa i le tausaga e 2022 i le taimi o le faama’i Koviti -19 lea sa ofoina mai ai foi le lagolago a lona malo i galuega o le puipuiga o Samoa mai lea faama’i.
O loo iai le ofisa o le Iunaite Setete i lo tatou atunuu ae ua na o se sui o lea malo e faauluulu iai, ae o le amepasa e faamautū i Ueligitone i Niu Sila.
Ua iai nei fesuia’iga o pulegamalo a le Iunaite Setete o Amerika ina ua mae’a le palotaina o lona tofi Pelesetene, ma e lē o iloa pe faaauau ai ma le fuafuaga ua mae’a faalauiloa, o le iai lava lea o se amepasa o lea malo tele e faamautū i Samoa, e pei ona iai Amepasa, ma Komesina Maualuluga o isi malo i fafo ua faamautū i totonu o le tatou atunuu.
