O le aga’i mai ma papaaao o tatou tagata Samoa i Niu Sila, faapea foi Ausetalia, Amerika ma isi atunuu e lē faigofie, aemaise o mea uma lava e totogi i le tupe. E tāua tele ai le silafia e o tatou tagata o ofisa o le Malo faapea auaunaga e maua ai le fesoasoani mo le atina’eina o aiga. O nisi nei o auaunaga tāua mo le silafia e o tatou aiga o loo alala i Niu Sila. Afai o loo e maua lenei fesoota’iga, e tāua lou faasoa atu i outou aiga o loo alala i Niu Sila, aemaise lava o le aai tele o Aukilani:
GALUEGA TOTOGI LELEI:
O loo sa’ilia nei ni tagata faigaluega malolosi mo galuega totogi lelei i Taupo mo tagata Pasefika. O lenei polokalame o le a mafai ai ona maua galuega tumau i nisi o atina’e tetele a Niu Sila ma lelei totogi. O le a mafai ai foi ona a’oa’oina o tatou tagata i galuega tau masini mamafa (heavy machinery) ma maua ai o latou laisene, O lenei polokalame e talafeagai lelei mo aiga talavou e siitia e nonofo i Taupo mo galuega. O loo lelei a’oga mo fanau, ma e mafai foi ona atina’e ai aiga mo le manuia. Mo nisi faamatalaga, faafesoota’i ASA Foundation i le imeli edwin@puni.co.nz poo le telefoni (021) 618-042.
FESOASOANI MO AIGA I MANUREWA:
O loo maualuga pea le taugatā o le soifuaga i Niu Sila ma ua lē lava ai le faasoa mo nisi o aiga i totonu o Manurewa. O loo ua iai nei le auaunaga a le ASA Whanau Ora mo aiga e lē o mafai ona gafatia le totogi e vaai ai se foma’i, faapea le fa’iina o oloa ma isi fesoasoani tau le soifua mālōlōina. O loo mafai foi ona maua atu se pusa mea’ai mo aiga o loo iai se faaletonu i fesoasoani a le Malo; faafesoota’i mai ASA Whanau Ora i le telefoni (021) 618-042 poo le imeli edwin@puni.co.nz
LUPE NA FOFOA I VAOESE:
Ua amata nei a’oga a le Lupe na Fofoa i Vaoese i lo latou nofoaga fou i le Manurewa Sports Centre, Mountfort Park, 180 Weymouth Road, Manurewa. Aso Gafua (7:30pm – 9:30pm): Vasega Faamatai; Aso Lua (7:30pm – 9:30pm): Vasega Aumaga & Aualuma; Aso Lulu (7:30pm – 9:30pm): Vasega Amata. O loo mafai ona auai i latou uma i fafo atu o Aukilani, faapea Ausetalia, Amerika ma isi atunuu e fia a’ooga e faaaogā ai le zoom. Mo nisi faamatalaga, faafesoota’i Hanna Asiata i le imeli lupenafofoaivaoese@gmail.com poo le telefoni (021) 0262 4935.
FALIU LE LA:
O le fili mo nai tagata matutua o le fiu e nofo fale, aemaise le nofo to’atasi pe a aga’i fanau i galuega ma a’oga. O le tāua lea o le faatasiga a tuaa matutua e fai i le Aso Gafua muamua o masina ta’itasi i le Manurewa Sports Centre. O lenei faatasiga o loo faafoeina e le ASA Foundation ma e tatala le avanoa mo soo se matua e aofia ai mātua mai Samoa o loo ua alala i Aukilani. E aofia ai polokalame faaleaganuu, faamalositino i siva, taaloga o le bingo, pelē ma le mu; faatasi ma le taumafataga mamafa o le aoauli. O le faatasiga o loo sosoo mai o le Aso Gafua 1 Setema (10:30am – 2pm). O se vaaiga lea o le faatasiga na iai o le Aso Gafua muamua o Aokuso: https://drive.google.com/file/d/11Is8jDwaKuBVJNs0uYAPUy0o1hJVwlLe/view?usp=drivesdk
FAAMANUIAGA O LE SITISENI NIU SILA:
O loo gasolo mai pea nai tuaa ua faamanuiaina i le sitiseni Niu Sila. Peita’i e lē o faigofie mo nisi o mātua ona o le tuai ona maua o penifiti. O se tasi o faafitauli o le laiti o fale o loo faamautū ai, poo le aumai foi o nai mātua ae o loo nonofo i isi aiga. O le tulaga tau fale o le Malo o le vaega sili lea ona faigatā, ma e umi se taimi o faatali se talosaga. E moomia ai le fuafua lelei a o le’i malaga mai i NZ nai mātua. O loo maua atu faamatalaga i le faafesoota’i o Teleiai i le imeli edwin@puni.co.nz
