O le Aso Lua o le vaiaso lenei na sa’ili fesoasoani ai lē sa avea ma First Lady poo le faletua o le ta’ita’i sa iai muamua o Peru, i le ofisa o le amepasa o Brazil i Lima, ae o le aso foi lava lea na lauina ai le i’uga e 15 tausaga i le falepuipui mo ia ma lona to’alua, lea sa avea ma Peresetene, o Ollanta Humala, ona o le aafia i moliaga o le teuina faasolitulafono o tupe, money laundering.
Fai mai le CNN na faailoa e le ofisa o le amepasa a Brazil aga’i ia Peru o lea na taunuu atu le tamaitai o Nadine Heredia i le taeao o le Aso Lua, ae lē o mailoa pe na ulufale atu i le ofisa lea i le taimi ua mae’a ona lauina lo la faasalaga pe na alu ane foi a o le’i lauina le faasalaga.
E le’i tuuina ane se tali mai le matāgaluega o le va i fafo a lea atunuu e tusa o se faamatalaga e faatatau i le mataupu lea ae o le faamasinoga na faia e faatatau i le aafia o Humala ma lona to’alua i teugatupe faasolitulafono ma ta’ua ai foi ma nisi o foa’i sa faia i le campaign o le palota a Humala i le 2006 ma le 2011.
O loo feta’ua’ina i isi lipoti na maua atu tupe a Humala mai le malo o Venezuela faapea se kamupani mai Brazil na faatupe ai lana campaign.
Sa teena e i laua ia o la moliaga peita’i ua faamaonia nei i le faamasinoga ma poloa’iina ai le tuli loa e amata i le taimi nei o le faasalaga i le falepuipui ae o lea ua sa’ili fesoasoani lona faletua i le ofisa i Brazil, ma o loo tālia sa latou tali i lea talosaga.
Puna o Faamatalaga: https://edition.cnn.com/2025/04/15/americas/peru-president-humala-prison-heredia-asylum-brazil-intl-latam/index.html
