Ua faailoa finagalo o faipule mai itu uma o le Palemene o Ausetalia i le asō e faatatau i le mataupu ua agiga i tusitusiga a le autusitala mai Amerika ma isi atunuu e faatatau i le feiloa’iga a tusitala ma le Peresetene o Amerika ua lipotia na ia ta’ua ai na te lē iloa poo le ā tonu le AUKUS.

O le feiloa’iga a Trump ma le Palemia o Peretania, Keir Starmer i le fale pa’epa’e na fesiligia ai e se tusitala pe o le a faia ni a latou talanoaga e faatatau i le AUKUS, ae fesili ane Trump poo le ā le uiga o le AUKUS.

Ina ua faamanatu atu iai e tusitala sa faailoa e Trump o loo lelei lava le mafutaga a Amerika ma Ausetalia.

O se tasi lenei o mataupu sa mata’itū e le to’atele ina ua toe tula’i mai Trump i le tofi, o le AUKUS o se faiga faapaaga tau le puipuiga i le va o Amerika, UK ma Ausetalia lea o le a faaalu ai e Ausetalia le $368 piliona e aumai ai vaamaulu faaniukilia ma faia i fausaga faaonaponei a o le’i oo i le 2030.

Na saunoa la le ta’ita’i o le Itu Agai, Peter Dutton o ia e talitonu e lagolago lelei lava e Trump le AUKUS e ui i le fesasia’i i le mataupu lea ina ua fesiligia.

Na faailoa foi e se tasi faipule sinia o Murray Watt e lē o popole ia i lea tulaga auā o loo tele foi mea o loo manatu iai Trump ua lē manatua lelei ai le AUKUS.

O le amataga o le masina nei na faailoa ai e le failautusi o le puipuiga a Amerika, Pete Hegseth o loo malamalama lelei Trump i le faiga faapaaga lea o le AUKUS.

Sa faia lana saunoaga i le taimi na tuuina atu ai le $500 miliona tālā Amerika, o le isi peimeni lea a Ausetalia aga’i ia Amerika e pei ona iai le maliega mo vaamaulu e pei ona ta’ua.

Puna o Faamatalaga: https://www.9news.com.au/world/donald-trump-stumbles-when-asked-about-aukus-defence-deal/6a602864-b990-4d37-95a4-530e31bd96e8