E ono faamalosia faletupe ma kamupani e faagaioia le social media e tuu ane ni tupe o se vaega o ni taui mo tagata ua aafia i faiga taufaavalea i luga o a latou auaunaga.

Ua ta’ua i le lipoti a le 9News o le faigamalo o iai nei ua o latou tuuina le 15 miliona i se ālafua mo tagata Ausetalia ua leiloloa tupe i faiga taufaavalea ma e le’i maua se tonu o a latou mataupu.

Fai mai le lipoti o le a mafai ai e i latou ia ona sa’ilia ni taui e tauala atu talosaga i le Australian Financial Complaints Authority poo le AFCA e tusa poo le talosaga o loo faia faasaga i nisi o auaunaga o loo faatinoina faaletulafono.

O lona uiga o platforms e pei o le facebook, instagram ma faletupe foi e ono mana’omia i latou i lalo o lea fuafuaga e tuu ane ni taui tau tupe i ē e aafia pe afai e lē lelei ona o latou malupuipuia a latou auaunaga ia ‘alofia ai faiga taufaavalea.

Fai mai le malo o gaioiga ua faatino i faiga taufaavalea nei o le a faaitiitia ai avanoa mo le autaufaavalea e taula’i mai ai a latou faiga i tagata Ausetalia ma o le a maualuga foi se tulaga o le a faatulaga mo pisinisi ia mafai ai ona o latou tetee atu i ia gaioiga faavalea.

O le faamatalaga lea mai le sui teutupe ma o le minisita foi o auaunaga tau tupe o Stephen Jones.

Fai mai le AFCA e silia ma le 100 afe faaseā i tausaga uma e faatatau i auaunaga tau tupe aemaise foi faiga taufaavalea e aafia ai tagata, ma o le folasaga la i le asō o se vaega o le tulafono a le malo ua faaigoa o le Scams Prevention Framework ae o faiga taufaavalea na faatino i luga o le social media mo le tausaga lava ia na te’a nei 2023, e $93.5 miliona tupe a tagata Ausetalia na ma’umau ai.

Puna o Faamatalaga: https://www.9news.com.au/national/scam-victims-to-be-compensated-under-financial-redress-scheme-federal-government-announcement/e3f3da37-b7b0-4781-988a-d469968a6666