O suauu ma penisini o nisi ia o oloa o loo mataitu pea e le lalolagi i o latou tau mai lea masina i lea masina, e pei foi o Samoa o masina uma e tulituliloa ai e le au fai taavale le aso mulimuli o le isi masina e utu faatumu ai tane penisinisi ma kiso ina nei sau tau fou o le isi masina ua felelei ane i le vateatea.
O lenei masina faaiu o lenei tausaga o se tala fiafia mo le au fai taavale mo le tau o le penisini ona o lea ua pa’ū le 17 sene i le tau fou e $3.34 sene i le lita faatusa i le tau sa iai i le masina ua mavae sa $3.51 sene i le lita.
O le kiso e leai se pa’ū ae ua siitia mai lona sa iai e $3.99 sene i le lita i le tau fou e $4.16 sene i le lita. O le kalasini e tasi le sene ua pa’ū ai lona tau lea sa $3.58 sene i le lita ua pau i le $3.57 sene i le lita.
I se pepa o faasalalauga mai le Minisita o le matagaluega o tupe a le Malo le afioga Mulipola Anarosa Ale Molio’o o loo ia faailoa ai, sa iai popolega i le pa’ū o le tamaoaiga o le lalolagi ma faaitiitia ai le manaoga mo le suauu, ae ua avea ma tulaga ua pa’ū ai le tau o isi oloa tau suauu, ae o le tau o le kiso o loo aafia ona o le faaitiitia o le tulaga maua mai le atunuu o Rusia agai i totonu o Europa lea o loo afaina ai le fesuiaiga o le tau mo le kiso.
O le siitia o le tau o le fefaatauaiga o le tala Amerika ua avea ma se tasi o aafiaga ogaoga i tau e faaulufale mai ai le suauu i Samoa, ma e tusa ma le 5 pasene ua pa’ū ai le tala Samoa agai i le tala Amerika.
