Ua sainia e le Peresetene o Amerika, Donald Trump i le aso 17 o Aperila 2025, le faalauiloaga ina ia toe tatala ma faataga Amerika Samoa e toe fagotaina ona ogasami ua leva ona iai tapu poo sā.
O se tala fiafia lenei i le aufaifaiva a Amerika Samoa auā talu mai le amatamataga o le tausaga e 2009 na faatulaga ai sā i nei ogasami o Amerika Samoa, lea e tusa ma le 200 maila le telē, ma e faatusaina e faa-3 ni setete o Kalefonia e tuufaatasi faato’ā maua le telē ma le mamao o lenei ogasami sa faasāina, ma e 4 i le 7 aso e malaga ai ni vaa fagota faato’ā te’a le 200 maila lenei o le ogasami.
O le itu faanoanoa ona o lea sa faasāsā ai le aufaifaiva a Amerika Samoa ona fagotaina ona lava ogasami ae meaane o lea sa fagogota ai isi atunuu e aofia ai ma Saina.
O lea sā na sainia i le vaitaimi o le pulega a le Peresetene George W. Bush i le amataga o le tausaga e 2009, ma na toe lagolagoina ma faalautele atili mai i le 2014 i le vaitaimi o le pulega a le Peresetene Obana ina ua tula’i mai, i le fuafuaga o le faasao o le gataifale o motu o loo iai le pulega a le malo tele le Iunaite Setete o Amerika, peitai sa lei lelei ona iai fesoota’iga ma tagata o Amerika Samoa.
Ina ua toe tatala e Peresetene Trump nei ogasami ua iai ma tuutuuga e pau vaa e mafai ona fagotaina nei ogasami, ua na o vaa e tauaveina le faailoga o fu’a a Amerika ma le fu’a a Tutuila poo Amerika Samoa.
O le aumai ai o lenei tala, ua o se meaalofa sili lea mo tagata uma o Amerika Samoa, a o faamanatuina ai le 125 tausaga o le latou fu’a (16-18 Aperila) i lenei tausaga.
Ua faaleo le fiafia tele o tagatānuu o Amerika Samoa aemaise i latou o loo fagotaina le tuna mo le kamupani i’a i le motu i Sasa’e ma o se isi lea tulaga lelei mo le tamaoaiga o le atunuu, e ui e lē o taliagofie lenei suiga e i latou o loo galulue malosi e puipuia le siosiomaga ma meaola o le gataifale.
Puna o Faamatalaga: https://pmn.co.nz/read/pacific-region/us-reopens-protected-pacific-marine-reserve-sparking-outrage-from-environmentalists
