A o i Samoa ni tamaitai talavou se to’atolu ona o se faamoemoe faaleekalesia, sa leai so latou silafia o le latou tafaoga i se faletalimalo i se tasi o afiafipo, o le a taunuu i ni gaioiga solitulafono ma matagā a se alii talavou sa latou fetaui i lea faletalimalo i Apia.
O Aperila o le tausaga nei a o iai ia tamaitai i lea nofoaga mo se tafaoga na fetaui ai le tasi o i latou ma lē ua molia ina ua faamasani iai le alii o Lui Poka na molia e leoleo i ni solitulafono se fitu.
Na i’u ina inu ma tafafao faatasi ai ia tamaitai ma lē ua molia, seia oo ina alu le latou taelega i le vai tā’ele o le faletalimalo ae maua e lē ua molia le ki o le taavale ma alu ai e aunoa ma le iloa e tamaitai.
O le po lava lea na oo ai le malaga a lē ua molia i le taavale i le fale sa faamautu ai ma nonofo ai tamaitai i le lotoā a se ekalesia.
Na talepe ai e Lui le faitotoa o le fale ae ulufale faamalosi i totonu a o tofafā tamaitai.
O tolaulauga a leoleo o loo faamatala ai gaioiga solitulafono ma le matagā na faia e lē ua molia, seia oo ina vili e le tasi o tamaitai leoleo.
E oo atu malu o le malo o loo iai lava le taulealea i le fale ma latou pu’eina ai loa ma ave mo suesuega.
Na ioe Lui i moliaga e fitu a leoleo e pei o lona taumafai e faatino se sootaga tau faigaaiga ma tamaitai, talepe fale, gaoi o le taavale, o moliaga o le faaleaga o meatotino ma lona moliaga o le faamata’u e faaoo le oti, ma le umia o se a’upega mata’utia o se uamea.
O le togisala a le faamasinoga e 52 masina poo le 4 tausaga ma le 3 masina i le falepuipui, toesea ai ni masina sa nofo taofia ai.
Ua faatonuina le ave o le suafa o Lui Poka Saveu e faamau i le lesitala o tagata ua faamaonia moliaga tau faiaiga.
Ua matuā tapu ma faasā e le faamasinoga ona faalauiloa ni faamatalaga e iloa ai tamaitai e to’atolu na aafia i le solitulafono.
