Ua lāgā le tatau ona faia suiga o tulafono o visa faigaluega.
O le talosaga lea a le minisita o le Immigration i le aliae o fanau na omai i Niu Sila i lalo o visa faigaluega.
E toa 16 fanau e aofia ai i latou e ta’i 11 tausaga le matutua na omai i lalo o faafiafiaga a le Zirka Circus ma e le faapea e na o le faatasi ona omai i ia faafiafiaga, i lipoti e faitau tausaga talu ona faia nei malaga taamilo.
I le tele o ia tausaga e lei iloa seia oo ina aveesea faamalosi fanau e toaono ona o le lē lelei o nofoaga o loo nonofo ai faapea ma feteenaiga i totogi.
O fanau nei na omai i Niu Sila i lalo o visa faigaluega poo visa nei e le o iai ni tulafono e faatatau i le saogalemu o fanau, le manuia lautele o fanau e aofia ai ma aoaoga.
O loo teena e i laua sa avea ma pule o le Zirka, Jeni ma Judy Hou, ia tuuaiga o le faafaigaluega o fanauiti nei ma le tala o lea sa taumafai lava e ave i aoga peitai o le toatele e lei fia aooga.
I se faamatalaga a le peresetene o le Migrant Workers Association Anu Kaloti, o loo ia lagolagoina le manatu o le minisita ma lana tala ua tatau nei loa ona taofi vave le faataga o tagata e i lalo o le 18 tausaga e omai i lalo o visa faigaluega.
