Sa lipotia i le aso ananafi le faia o le faaiuga a le FIFA, le Federation International of Football Association poo le totino lea latou te faafoea le taaloga soka faavaomalo, e ofoina ai le 20 afe o pepa matamata e leai se totogi mo taaloga a le itupa o tamaitai i le Ipu o le lalolagi i Niu Sila nei ona o popolega i le aofai o le aumatamata i le taamilosaga lea i Aotearoa.
I se folasaga na faia i le aso ananafi i Ueligitone e le Xero, o se tasi o paaga aloaia a le FIFA, ua faamaonia ai lea fuafuaga, e 5 afe free tickets o le a ofoina i se taaloga i nofoaga e fā o Niu Sila ua atofa e faia ai ia taaloga.
O lona uiga la o le aumatamata e vave gaioi i le mauaina o ia tickets o le a maimoa fua i taaloga e fa e pei o le fetauiga a Filipino ma Switzerland i Dunedin i le aso 21 o Iulai, le taaloga a Spain ma Costa Rica i Ueligitone i le aso lava lea, taaloga a Zambia ma Iapani i Hamilton i le aso 22 o Iulai ma le fetauiga a Spain ma Zambia i Aukilani i le aso 26 o Iulai.
Na amata atu i le aoauli o le aso ananafi ona mafai ona maua ia pepa matamata fua pe a agai i le upega tafailagi a le auaunaga lea ma tuuina ai le code 23XERO.
O loo ta’ua i le lipoti a le 1News se faamatalga mai le FIFA ua ausia le 125 miliona o tickets ua faatauina ae na o le 320 afe o ia tickets e mo taaloga i Aotearoa ae o le aofaiga tele e mo taaloga i Ausetalia.
