O le tauvaga o le sailiga Tausala a le Kelope poo le Miss Global i le 2024 lea ua ofoina mai ai e le faalapotopotoga o loo nafa ma le faatinoina o lenei tauvaga le avanoa mo Samoa e na te talimalo ai ma faatautaia le tauvaga i ona laufanua.

E pei ona ta’ua e le Sui Palemia, Afioga Tuala Tevaga Ponifasio i lana saunoaga i le sauniga o le faapaleina o le sui tauva a Samoa mo le tauvaga i Vietnam na ia faailoa ai, o loo iai le lagolago a le faalapotopotoga a le Tausala Samoa pe a faatino lenei tauvaga i le atunuu.

“O loo aumai le lagolago a le faalapotopotoga a le atunuu o loo feagai ma le sailia o se Tausala a Samoa e ala i le tauvaga ina ia tapena ai e talimalo i lenei faamoemoe.”

Na faaalia le finagalo o le Pule Sili a le kamupani telefoni a le Vodafone Samoa Rana Bose e tusa ai o lenei avanoa.

“O se tauvaga tele o loo silafia e le toatele e le o se faamoemoe itiiti ma e tele foi le seleni e ao ina faaalu e tapena ai.

“O le taimi nei o loo faia suesuega talafeagai a le kamupani e silasila ai i tulaga uma e ao ina moomia mo lenei tauvaga.

“O le isi foi lea avanoa e le aumaua ae peitai e ao foi ona silasila i le tulaga e mafai ai ona tatou talimalo i lenei faamoemoe auā a silasila iai o atunuu e fia o le lalolagi lea o le a paau mai pe a faapea e faataunuuina lenei tauofoga.”

Saunoa Bose o loo ua amata foi ona faia faatalatalanoaga ma logoina foi paaga ma i latou e fitoitonu pe iai le fesootaiga ma tauvaga i so latou finagalo i lenei avanoa.

O le tauvaga lenei e sailia ai Tausala o le Kelope o loo talimalo ai Vietnam i le tausaga nei ma o se taimi muamua foi lenei o le a auai ai se sui o Samoa e tauva i lenei tauvaga e pei ona pale mai ai Haylani Kuruppu.