Ua faafofoga le atunuu i le saunoaga faalaua’itele mai le tamaitai Palemia le afioga Fiame Dr Naomi Mataafa, ua faato’ā folasia ai sona finagalo talu ona faia lana faai’uga ua faamuta ai le tofi minisita o le sui Faipule o Gagaifomauga 3, sosoo ai ma le faamuta i le amataga o le vaiaso nei o tofiga o isi minisita e to’atolu o sui Faipule o itumalo palota o Palauli 1, Falealili 1 ma Palauli le Falefa lea ua suia ia Palauli 2.
O le finagalo o le ta’ita’i o le malo sa ia faailoa ai mafua’aga o lana faai’uga e pei o moliaga a leoleo ua faia i le susuga Laauli Leuatea Polataivao Fosi Schmidt, faapea le lē faatuatuaina o lana ta’ita’iga i le tofi Palemia e sui faipule sa avea foi ma minisita o lana Kapeneta le afioga Mulipola Anarosa Ale Molioo, afioga Leota Laki Lamositele Sio, ma le afioga Toelupe Poumulinuku Onesemo.
O le tasi o itu na fesiligia ai le ta’ita’i o le Malo o le lumana’i o lona tofiga Palemia pe afai ae usu le fono a le Palemene lea ua faatulaga mo le Aso Lua a sau ae faatū ai se lafo o le lē faatuatuaina o lana ta’ita’iga i le tofi Palemia.
I lana saunoaga faalaua’itele na muamua faasalalau ae le’i faia le feiloa’iga ma tusitala, o loo faailoa ai e le Palemia, o le faatuatuaina ma le lē faatuatuaina o lana ta’ita’iga o le filifiliga e faia e le Palemene.
Le afioga i le Palemia, Fiame Dr Naomi Mataafa.
