Ua iai popolega o nisi e lē taumate o le a faaopoopo foi nisi lu’itau mo nai nisi aiga pe a faamuta le tuuina atu fua o tests o le Koviti-19 e aunoa ma se totogi e pei ona faia pea talu mai le 2022.
O RAT Tests poo rapid antigen tests lea ua malamalama iai le to’atele i lona faaaogāina talu mai taimi faigata o le koviti, e amata atu i le vaiaso fou ona lē toe maua fua ae o le a faatau mai e le tagata e mana’omia mai supamaketi ma faletalavai ona e mae’a i le aso 30 o Setema le fesoasoani tau tupe sa faatupe ai.
Fai mai le Te Whatu Ora o tests e tuu atu i le taimi nei o le a mafai pea ona faaauau ona faaaogā seia oo ia Me 2027 ma o loo mafai pea ona faaaogā ae mo tests e faatau pe ā ma le $6 i le test e tasi pe $30 mo le pepa e 5 tests o loo iai totonu.
E to’atele foi e lē o fiafia i le faamuta o le faatupega o lea fesoasoani, fai mai a latou sa tatau i le malo ona faaauau pea le fesoasoani lea mo nai tagata mo se faamāmā avega i lenei vaitau o le taugata o le soifuaga.
Puna o Faamatalaga: https://www.newstalkzb.co.nz/news/national/health-experts-air-covid-19-concerns-as-free-rat-tests-end-next-week/
