O le auaunaga a le Mapu Maia o se auaunaga a le Pasefika e faatatau i le soifua mālōlōina o le mafaufau ma isi auaunaga fesoasoani, ua tatala nei lo latou ofisa i Kalaiesetete.
O le 2009 na amata ai lea auaunaga i lona ofisa i Aukilani faapea Hawkes Bay, Ueligitone ma le South Island e ui e le’i faatūina ai se ofisa mo le taimi nei.
Saunoa Philip Siataga o le pule o le vaega tau su’esu’ega a le Mapu Maia, i sana faatalanoaga i le RNZ e tāua tele lenei auaunaga ma e lē faapea e lē mafai ona faatino e auaunaga tetele tau le soifua mālōlōina o le mafaufau lea auaunaga peitai e sili atu le faatinoina o le auaunaga e tagata Pasefika lava ona o sootaga aemaise le gagana.
O Siataga e faamautū i le ofisa fou lea i Kalaiesetete ma ua ia ta’ua foi e telē le galuega e fia fai.
O le minisita o le Soifua Mālōlōina o le mafaufau, Matt Doocey sa auai ai i le sauniga e tatala aloa’ia ai le ofisa ma ia ta’ua ai e manana’o le faigamalo a Niu Sila e maua e tagata avanoa mo nei auaunaga aemaise o le maua o finagalo faaalia i auaunaga faapea aemaise pe afai o loo faafaigata ona maua ma vaevaeina.
Fai mai a ia e mana’omia ona avea le aufaigaluega ma sui o le atunuu i ona tulaga eseese o loo aofia ai.
Puna o Faamatalaga: https://www.rnz.co.nz/news/pacific/533234/pasifika-focused-mental-health-service-mapu-maia-opens-in-christchurch
