Na malaga le Manu Samoa Taitoafitu i le latou taamilosaga i Sepania ma le talitonuga ma le faatuatuaga atoa o le faiaoga ma le pulega ua lava tapena tama uma o le ‘au mo a latou taaloga na sauni atu iai.

O le taamilosaga lea i Sepania na saili ai ‘au e 12 pito i luga o le a toe sao atu mo le taamilosaga masani a le ta’itoafitu i le tausaga fou, peitai e lei manuia le taumafaiga a le Manu Samoa ma ua lē maua ai so latou avanoa mo le taamilosaga i le tausaga fou, ae o iinā na agiga ai ma faamatalaga, sa iai ni faufauga a nisi o tama ina ia taaalo e faafaia’ina le ‘au.

I se faatalanoaga a le faia’ogaulu o le ‘au ta’itoafitu, le afioga Muliagatele Brian Limā ma le fetalaiga ia Palauli Eddie Taualapini i lana polokalame masani o le ET Live i le Aso Toonai talu ai, na faamatala ai e le faiaogaulu le faaletonu na tula’i mai ia latou tapenaga a o iai i Sepania.

Na fesiligia e le ET Live le faiaogaulu pe na te lei tau iiteina se tulaga faaletonu o loo iai le ‘au a o iai i Sepania, ae na tali Muliaga, e leai ma sona iloa i se faufauga faapea o iai, peitai na tau oso faalogona ona i le vaiaso lea ina ua taunuu ma amata a latou tapenaga ma toleniga, sa ia maitauina e iai tama taaalo ua amata ona pei ua lē faalogo pe faaali ane uiga e pei e liuliu fia faalii pe a fai atu se faatonuga, peitai e lei iai lava sona lagona o se tulaga lea o le a tupu ona o lea sa ave lava lona faatuatuaga i tama taaalo na filifili mo le ‘au.

Na saunoa Muliaga, ae ina ua talatalanoa ane ia te ia le kapeteni ia Vaa, na amata ai loa ona oso ane ona lagona ae sa tumau pea lona faatuatuaga i le ‘au, peitai o le aso na fai ai le Captain’s Run poo le toleniga lea e toleni ai na o le ‘au ma le kapeteni e lē auai le faiaoga, e lei avanoa le kapeteni ia Vaa ona sa fetaui tonu ma le taimi e fai ai le puega ata a kapeteni, ona ia tofia ai lea o se tasi o tama sinia o le ‘au e tauaveina le tofiga lea o le kapeteni i le captain’s run.

Na saunoa Muliagatele, e na o le lima minute ae uma le captain’s run, ma o se taimi muamua lea ua tupu ai se mea faapea; na ia fesiligia le alii na avea ma kapeteni pe aisea ua na o le lima minute ai le umi o le captain’s run ae tali ane o la ua kava uma mea e moomia ona fai.

O iina na tau oso ai ona masalosaloga i suiga ia ua iai peitai sa tumau pea lona faatuatuaina o tama; ae ina ua faaletonu le tulaga o le ‘au ia latou taaloga, o iinā a o latou iai pea i Sepania, na agiga ai tala ia e sāua faapea, e iai nisi o le Board poo le Komiti Faatonu o lea sa i tua o tama ia e toafā na oatu ma le faufauga e faaleaga le faiga o le taaloga a le ‘au ina ia faia’ina ma lē maua ai se avanoa e agavaa ai mo le isi taamilosaga i le tausaga fou.

Na foi mai ma avatu le faaaliga a le Komiti Faatonu e tatau ona fai se review poo se suesuega i le tulaga faaletonu na iai taaloga a le ‘au i Sepania, ma o le suesuega lena na faia i le aso 10 o Iuni, ma maua ai loa le faai’uga o le a faamālōlō tama e toafā na aafia, ta’ua e Muliaga, e aofia ai ma le tama lea na ia tofia e kapeteniina le captain’s run.

O le aso 10 o Iuni na fai ai le suesuega ma le review ae o le aso 12 na tuufofoga ane ai le i’uga e le ta’ita’ifono i luma lava o le komiti faatonu, e toafā tama ua faamālōlō ae o le a toe tapena le pulega ma isi tama o le ‘au mo le faamoemoe i le Olimipeka, ae se’i foi mai le ‘au ona toe fai lea o se isi iloiloga atoa.