O Samoa le atunuu muamua ua faamautū lona maua o le foa’i tupe e 2 miliona tālā tupe Amerika i le polokalame o le tapenaina o taumafa ia lava poo le food security, o loo taulamua ai le faalapotopotoga o taumafa a le lalolagi le F.A.O. poo le Food and Agriculture Organisation a Malo Aufaatasi, i se polokalame a lea faalapotopotoga o loo autū i le tapena o atunuu e pei o Samoa ia faatino atina’e tau faato’aga, o lafumanu ma faigafaiva ina ia lava taumafa mo tagata.
O le avea o Samoa ma atunuu muamua ua na maua lea foa’i o se grant e lua miliona tālā meleke, ua avea ai tatou ma atunuu muamua i le Pasefika ua faamautū ana polokalame e fesoota’i ma lea fuafuaga a le faalapotopotoga o taumafa a le lalolagi.
I se pepa o faamatalaga o loo faailoa ai e le Minisita o Faato’aga ma Faigafaiva le afioga Niuava Eti Malolo, o se isi lea o matati’a ua ausia e Samoa i taumafaiga a le malo e una’i ma siitia atina’e tau faato’aga, lafumanu, ma faigafaiva.
Ua iai foi faalapotopotoga eseese o loo autū a latou polokalame i le una’ia o faato’aga ma lafumanu faapea faigafaiva ma ua talafeagai ai lea vaegatupe ua maua, mo le faaopoopoina o fesoasoani e tuuina atu i le lautele o le atunuu mo le atina’eina o taumafaiga uma e fesoota’i i le polokalame o tapenaga ia lava ma tele taumafa.
