E 39 tausaga le matua o le tamā na saisai mai e leoleo ananafi ona e lē gata o lea na ia faaleagaina taavale leoleo ae o lea foi na ia toe faaoolima i malu o le malo.
Na amata mai i tuliga taavale pe tusa lea o le te’a o le 10 i le taeao ananafi i Five Cross Roads i Hamilton.
O ni tuliga na toe faasagasaga mai ai lē ua taofia i taavale leoleo ma faasasa’o iai lana taavale, ma e faapea e lua taavale leoleo lea na ia faaleagaina.
I lipoti a leoleo e faafetai e leai se isi na faamanu’alia ai, ma o le taimi foi lea na mafai ai loa ona poloka e leoleo le taavale na ia faaaogāina.
A o saisai mai ai e leoleo na ia toe faaoolima ai loa i leoleo e to’alua, ma i lipoti ua na o ni manu’aga mitimiti.
O le asō e tula’i ai lē ua molia i luga o le faamasinoga faaitumalo i Hamilton.
