Na valaau ane leoleo i se unit i le amataga o le vaiaso nei i He Ana Way ma maua atu ai ni alii se toalua o loo faamanu’alia ma sa lipotia atu foi i talafou.
O lea ua maua se lipoti lata mai o le mataupu lea e pei ona lipotia i le Televise 1, o le isi na faamanu’alia na mulimuli ane maliu mai ona manu’aga ae o le isi e 25 tausaga na avatu i le falemai e tigaina foi ma ua lipotia o ia lea na molia i le faaoolima peitai a o faaauau ai suesuega a leoleo na toe suia ai le moliaga i le fasioti tagata.
Fai mai leoleo e leai se isi tagata o sailia i le mataupu lenei ae e tatau ona tulai lē ua molia i luma o le faamasinoga i Aukilani i se taimi o le asō.
Ta’ua foi e leoleo e lē o mafai ona faailoaina le suafa o lē ua maliu i le taimi nei ae lē o fia faia foi nisi faamatalaga ona ua i luma o le faamasinoga le mataupu.
O le faalavelave lea na tupu i se fale o le Kainga Ora i Mt Albert i le Aso Gafua o le vaiaso nei.
