Ua aumai i se tulaga faalaua’itele se pepa o faamatalaga mai le Matāgaluega o Leoleo, Falepuipui ma le Toe Fuata’ina, ua faailoa ai le molia o le tamaitai o Lise Marie Schmidt i solitulafono o le faia o ni tuua’iga ogaoga ae e sese ma leai ni mau e faavae ai, faasaga i le ta’ita’i o le Malo le tamaitai Palemia le afioga Fiame Naomi Mataafa.

O ia tuua’iga o loo faailoa i se tusi a Lise na tuuina atu i leoleo.

Ua molia ai lea tamaitai i le moliaga o le taupulepule e natia le faia o le amiotonu ma le moliaga o le tuuina atu o faamatalaga e lē sa’o e faasese ai leoleo.

O nisi o lipoti i lea su’esu’ega a leoleo o loo faailoa ai o tuua’iga o loo i le tusi a Lise o loo aga’i i le faalavelave na maliu ai le tamaitai Polofesa o Caroline Sinavaiaana Gabbard lea na tupu i le masina o Me o le tausaga na te’a nei, ma o loo molia ai le tamaitai tusi solo ma tala fatu o Papalii Sia Fiagel.

Faaalia e leoleo i le pepa o faasalalauga o le taunuuga o a latou su’esu’ega ua iloa ai e leai ni mau ‘anoa ma talitonuina e lagolago ai ia tuua’iga faasaga i le ta’ita’i o le Malo.

Ua tatala Lise i ni aiaiga e pei o le saini i le ofisa o leoleo i Faleata i Aso Faraile ta’itasi, taofia lona tusifolau ma pepa malaga uma, ma ia aua nei toe soli tulafono a o tatala i tua e faatali ai le aso 15 o le masina fou o Aperila e valaau ai moliaga ma tula’i ai i le faamasinoga.

O lē ua molia o loo iai nisi moliaga o loo tuua’ia ai ona o le mataupu tau faamasinoga o loo molia ai lē sa avea ma Minisita o Faato’aga ma Faigafaiva le susuga Laauli Leuatea Poalataivao Fosi Schmidt, o le sui faipule o Salega Tasi le afioga Fepuleai Faimata Su’a, faapea se tamalii sa avea ma leoleo sinia le susuga Li’o Faataumalama.

O le mataupu foi lea o loo molia ai Samuelu Su’a ma lona to’alua o Sivai.

O Samuelu o loo nofo taofia i le vaavaaiga a leoleo.