O le vevesi na tulai mai i le va o ni tupulaga o nuu o Fagafau ma Samata i tai i le po o le Aso Sa na te’a nei, ma maliu ai se taulealea talavou i se laau malosi, o lea ua molia ai e leoleo se tama tane 50 tausaga le matua i le solitulafono o le fasioti tagata faamoemoeina ma o loo nofo taofia i le vaaiga a leoleo.

O lē ua molia e mai le afioaga o Fagafau, ae o lē ua maliu e mai le afioaga o Samata i tai.

O le Aso Lulu le ogatotonu o lenei vaiaso e pei ona faailoa i luga o fesootaiga televavave o le api o foliga, na faia ai se ifoga a le nuu o Fagafau lea sa faatino i le afioaga o Samata i tai e mafua i le vevesi na tulai mai ma taunuu ai i le fano o se soifua i se aupega o se laau malosi. 

Ua faailoa e leoleo o le vevesi na mafua i se mataupu tau fanua ua mae’a ona faia iai se faaiuga a le faamasinoga.

O loo faagasolo pea suesuega a leoleo.

O se isi o mataupu o loo faia iai suesuega a leoleo e aafia ai lava le solitulafono o le fasioti tagata faamoemoeina, ma e toalua ni taulelea ua molia ai.

O lea solitulafono sa tulai mai i Nuu lea na maliu ai se tama tane na pu’e e nisi lona ata ma faasalalau i le api o foliga e tau saili ai tagata o lona aiga e mafai ona latou faamaonia poo ai lea tagata ua maliu.