Ua taoto atu nei i le Faamasinoga Maualuga a le atunuu le lu’i faaletulafono a le vaega faaupufai e puipuia aiātatau a tagata ua molia ai le Palemia ma minisita o le Kapeneta, o le vaega faaupufai o le Faatuatua i le Atua Samoa ua Tasi, ma le Fofoga Fetalai o le Palemene.
O le autū o le finauga lenei o le aveesea o le tofi Palemia mai le sui faipule tamaitai o le itumalo faapalota o Lotofaga le afioga Fiame Naomi Mataafa, i le mau a le itu talosaga ua leai se faatuatuaga ona ua lē o i le Palemia le numela fulisia o le vaega faaupufai o loo tu nei i le foe.
O ni vaega o lea finauga ua lipotia e le nusipepa o le Samoa Observer lea o loo faailoa ai, o loo faaaogā e le Itu Agai i le latou finauga e avea o ni molimau e lagolago ai le latou lu’i faaletulafono, finagalo o nisi o faipule o le faatuatua i le Atua Samoa ua Tasi i ni faatalanoaga i auala o fesoota’iga faatekonolosi le social media.
E latou te faaaogāina foi se saunoaga a le Palemia i le Palemene i le aso 21 o Ianuari lea na faailoa ai le faai’uga a le Fofoga Fetalai e tusa o le faamuta o le toe avea o le Palemia ma minisita e to’alima o lana Kapeneta ma sui aloa’ia o le latou pati faaupufai.
O loo mau le finagalo o le to’aono o minisita ua aveesea ma lea pati o loo avea pea i latou ma sui aloa’ia o le vaega faaupufai o le Faatuatua i le Atua Samoa ua Tasi ma e oo mai i le taimi nei, e le’i tuuina atu i le faamasinoga se lu’i e iloilo ma aumai ai se faai’uga o lea finauga.
Ua faailoa foi e le Fofoga Fetalai e leai sona malosi’aga e faagafua ai nofoa o ia faipule e to’aono ona ua na o le faamasinoga e faia lea faai’uga.
O le a faatulaga e le faamasinoga se aso lea e lē o iloa, e valaau ai le mataupu ua faaulu e le vaega faaupufai o loo agaia le malo.
