E $1.5 miliona tala Amerika e tusa lea ma le $4 miliona tala Samoa lea na faaagaga e le Malo o Amerika Samoa e lisiina ai le fanua i Moataa mo le fausia ai o se ofisa o le Malo a le teritori.
I lipoti mai le KVZK, o le aso a taeao o le a faatino ai le sauniga e suaina ai le eleele lenei i Taumeasina i Moataa e amatalia ai le faatinoina o le galuega e fausia ai le ofisa e tapuvae tasi uma iai mataupu a tagata o lea teritori aemaise e taunuu mai ai sui o le Malo pe a faimagalaga mai iinei i Tumua.
O le seleni sa faailoga mo lenei faamoemoe o loo i lalo o polokalame faapitoa a le Malo ma o le fanua o le a lisiina mo le 9 masina le umi e pei ona molimau ai le Loia Sili ia Fainuulelei Falefatu Alailima Utu i luma o le Senate i le masina o Iulai ina ua mae’a sainilima ai le Palemia o Samoa ma le Kovana Sili a o usuia ai le fonotaga a le Atoa o Samoa i Amerika Samoa.
“Sa asia i le tausaga ua mavae le fanua i Vailima ma molimauina ai le fale tele a le ofisa o le Malo o Saina o loo fausia ai.
“O lea la na a’e ai le tofa i le Afioga i le Kovana Sili se’i talosagaina le Palemia o Samoa pe iai lava se isi fanua e mafai ona lisiina e le tatou Malo i Samoa i Sisifo.
“E pau a lea o le fanua e tu lata i le taulaga na saunoa le Minisita o le Siosiomaga ia Toeolesulusulu Cedric Schuster o loo avanoa e mafai ona lisiina mai i lo tatou Malo ma e eka e fetaui ma le eka lea e lisiina atu e tatou iinei i Tafuna i le Malo o Samoa.”
Ua talafeagai lenei nofoaga o le a lisiina mo Amerika Samoa ma le finagalo o le Kovana ona o itu e lē mamao lea ma le malaevaalele i Fagalii ma le uafu i Matautu mo tagata femalagaa’i mai le Malo o Amerika Samoa.
O le masina o Iuni sa galulue ai le Silva Group e faato’aina lenei fanua.
