E foliga ua faasolosolo pea ina maualuga le tau o le kiso nai lo le penisini 91 e pei ona matauina i le tele o pamu penisini i le atunuu.
O le faaiuga o le vaiaso ua maitauina ai ua oo atu i le 2.57 sene i le lita ua faatau ai le kiso ae 2.56 i le lita le penisini 91 i le tele o pamu ae sa maitauina foi i le masina o Aokuso o le tausaga nei lava na iai le taimi na sili ai foi le tau o le kiso i le penisini 95.
I le lipoti i luga o upega tafailagi i le asō ua faailoa ai molimau mai nisi o faipisinisi faapea e faatoa tulai mai lea o se tulaga faapea talu ona iai i auaunaga faapisinisi ma e lei iai lava se taimi na taugata atu ai le kiso i lo le penisini.
O mafuaaga lava e pei o gaioiga a le OPEC, atunuu ia latou te sapalaia mai le suauu atoa ai ma solo tetee a nisi o tagata faigaluega i fale suauu i Frani aemiase le siitia foi o le tau o le soifuaga o nisi ia o mafuaaga o loo taua ua atili siitia ai pea le tau o ia vaega.
O loo iai pea le popolega i le toatele aemaise le aufaipisinisi i se tulaga o se recession e ono aafia ai le lalolagi ma atili faalogoina ai e tagata le mafatia e le gata i le tau o fale ae faapea foi oloa i faleoloa faaopoopo atu iai ma le taugata o le penisini ma le kiso.
