Ua tuuvaa atu nei le ‘au taitoafitu a le Manu Samoa mo Farani i le nofoaga o loo faagasolo ai le Olimipeka i lenei tausaga.
Ae na latou afea Aotearoa mo le tasi le aso a o lei malaga ese atu mo Farani, ma sa maua ai le faatalatalanoaga ma le fetalaiga ia Fofogamua Seumanu Francis Ioane i luga o le Radio Samoa i tapenaga a le Manu mo lenei faamoemoe.
Na ta’ua e le susuga i le faiaoga ia Fata Muliagatele Brian Lima, o loo manuia uma le ‘au e toasefulufā ua filifilia ma o loo manuia foi le pulega o le ‘au.
O le susuga ia Vaafauese Maliko o lea ua filifilia e fai ma kapeteni o le ‘au i lenei taamilosaga.
O Maliko sa taalo i lana konekarate i Farani i le lua tausaga talu ai, o lea ua mae’a lana lua tausaga ma ua toe foi ai i Samoa e tautua le atunuu e ala i le lakapi ma ua toe filifilia ai e le faiaoga ma le pulega e fai ma kepeteni.
O le tusilima ai o le faiaoga i le susuga ia Maliko e fai ma kapeteni ona o se tagata e malosi, lelei lona ta’ita’iina o le ‘au, talanoa ma faamalosi i tama taaalo i totonu o le malae a o faasolo le taaloga.
E telē le tāua o le toe foi mai o Maliko i totonu o le ‘au, ae sili ai o lea ua faataunuuina lana moemitiga sa iai o le fia avea lea o ia ma tama taalo e ta’ita’ia le autaitoafitu a le atunuu i le Olimipeka.
O le taimi muamua lea ua ofi atu ai le Manu Samoa i le Olimipeka, ma o se fiafiaga sili lea i le alii faiaoga ma le pulega ona o le avanoa faaauro ua ofi atu ai le ‘au a le atunuu, auā o le Olimipeka e sili atu lana taamilosaga nai lo le taamilosaga o le Ipu o le Lalolagi ma isi lava taamilosaga o le lakapi taitoafitu.
E 12 ‘au o lea ua filifilia mai le tele o ‘au a le lalolagi ae o lea ua filofilo atu ai ma Samoa.
Sa iai faaletonu o le ‘au i le taimi ua tuanai, aemaise ai o le tele o tama sa lavevea, ma e telē se lesona sa a’oa’oina mai ai.
I le taimi nei o faaletonu na o lea ua toe poto ai le filifiliga o le ‘au mo lenei faamoemoe, aemaise ai o tapenaga o le ‘au ia lelei le mafaufau o tama taalo i taaloga uma, aua o lea ua latou iloa o le taamilosaga lenei, e fai si maulauga e lē manatu māmā iai se faiaoga ma se ‘au.
O ‘au e 12 o loo auai o ‘au lelei uma o le lalolagi o loo tauva ai.
O le talitonuga a le susuga i le faiaoga ia Fata Muliagatele Brian Lima ma le pulega o le ‘au, o le toasefulufā ua iai nei, ua iai le faamoemoe ua atoatoa lelei le malosi o tama e tauina ai le taua.
Ma o le a o foi ma le lototele e tauva mo se pine auā le tapuaiga a le atunuu.
Ua tuuina mai le saunoaga a le faiaoga i le paia ma le mamalu o le atunuu ia manuia le tapuaiga a o alofaiva ai ana tamafanau i nei faalagamaea o taaloga.
Ua latou vave tuua le atunuu o Samoa ma Niu Sila, ona o latou e tatalaina le taamilosaga o le lakapi o le Olimipeka a o lei amata aloaia lenei faamoemoe i Farani.
