Ua fai Aso Sa o Tina i le falepuipui i Tanumalala alii talavou e toalua na o la ave faagaoi le masini tuu tupe o se faleoloa i Moamoa fou.

O le faaiuga o le vaiaso na faailoa ai e leoleo i se lipoti le maua o le isi taulealea sa sailia ma ua maua uma ai ia alii e toalua sa sailia e leoleo, i le tuanai o lea gaioiga na matamata iai le toatele i le ata video na salalau i le api o foliga.

E lata i le 2 afe tala le tupe na iai i le masini i le taimi na aveesea ai, ae na toe maua lava e leoleo i le aso na alu ai le osofaiga le masini tuu tupe.

O le Aso Gafua, 27 o Me o le a tutulai ai ia alii e toalua i le faamasinoga maualuga e tali i moliaga a leoleo.