Ua molia e leoleo se alii 44 tausaga le matua o se tasi o pasese na malaga mai Amerika Samoa i se malaga a le Talofa Airways i le Aso Toonai na te’a nei, ma sa ia faaulufale ai i le atunuu ni maruana.
Ua faailoa e le Komesina o leoleo i se lipoti i lenei vaiaso e lē gata ina maua laau faasāina o aumai faasolitulafono e lea tagata, ae sa maua foi o ia umia se tinoitupe e tusa ma le 8 afe tala Amerika.
Sa faailoa e le tagata ua taofia nei o ia sa malaga i Tutuila e faatau ana koko Samoa, ma e lē taumate o ni koko malū.
Ua molia ai lea alii i le umia o laau faasāina ma le aumai faasolitulafono i Samoa o nakoti.
