E toatele tagata Ausetalia o le a faaitiitia tupe totogi i tau o a latou fualaau ma vailaau mo togafitiga poo medication e ui e manatu nisi e le o se fuafuaga lelei lea.
Fai mai pe oo atu i le 6 miliona o tagata Ausetalia o le a faaitiitia tupe totogi i medication ina ua faataga ane e le malo se faiga o le a totogi ai e le tagata le sapalai o ana fualaau ma vailaau mo togafitiga i masina e lua i se totogi e tasi, lona uiga o le a lē toe lua ni totogi ae tasi lava mo masina e lua.
E silia ma le 300 fualaau ma vailaau o loo aofia ai i le lisi ia o medication e aofia ai ma togafitiga mo gasegase e pei o le fatu, cholesterol, Crohn’s disease ma le hypertension.
E teena e le minisita o le soifua maloloina Mark Butler nisi o faamatalaga mai le Pharmacy Guild e faapea o le faiga lea o le a sioti ai loa ma fualaau.
Fai mai le minisita mai le 325 o fualaau ma vailaau o loo aofia i le lisi tele lea, e na o le 7 lava fualaau o loo sioti i le taimi nei ae o le a tele foi se vaega tupe a le malo o le a faasaoina mai ai i le faiga lea i totonu o le fā tausaga.
