Ua ioe nei e le alii o Kevan Darryl Salisbury i luma o le faamasinoga faaitumalo i Nepier le 9 o ona moliaga, e aofia ai lona tuuina atu ma le ofaina o le faatuina atu pauta faasāina o le methemphetamine ma le pauta faasāina o le fantasy, faapea ai ma le moliaga o lona umiaina o se mea faigaluega na fausia lava e ia o le home-made taser.
I talaga o lenei tagata; o Salisbury e lē fou i soligatulafono, faamauina e tusa ai ma faamaumauga na amata mai lava gaioiga solitulafono a lenei alii i le tausaga 2010, ina ua maua e leoleo mai se tasi o a latou galuega tele na maua ai le tasi o faleoloa mo laau totō e faapea e mafai ona agai atu ai tagata e faatau ai mea faigaluega e fesoasoani atu lea e totō ai laau faasāina o le maruana.
I le tauga lava lena 2010, na faasala ai mo le 10 masina e nofo vaavaaia ai i le fale poo le home detention, ona o lona faaaoga ai o lana falefaigaluega ma lona fale e fai ma nofoaga e faatino ai le totoina o maruana.
I le tausaga 2015 na falepuipui ai Salisbury mo le 2 tausaga ma le 2 masina i moliaga o le totōina o maruana ma lona ofaina o le faatau atu o lea fualaau faasāina ma lona faaoolima ai i lana uo poo lona toalua faapouliuli.
O moliaga na folasia i le maea ai ona faatino e leoleo o so latou sailiiliga na faia i le fale a lē o loo molia na maua ai le 24 o laau faasāina.
Na maua foi faamaumauga i lana telefoni, o loo faailo ai lona faatauina atu o ni suaauu mai le maruana ma le tele o ana paaga o loo faatauina ia fualaau faasāina.
Ma e tusa ai ma ripoti a leoleo, o lo latou iloa e lē o iai lava i se tulaga e suia ai lenei tagata i le toe maua ai foi o faamaumauga ma faamatalaga na toe maua i lana telefoni ana gaioiga lava nei o le faatauina atu o laau faasāina; e pei ona faamau na amata faatino mai le amataga o lenei tausaga i le masina o Ianuari seia paia mai le masina o Mati 2025.
Ma i le ,molia ai o Salisbury na ia ioeina uma e ia moliga ua folasia faasaga ia te ia.
O le masina o Oketopa o le tomalaulau ai le iuga ma le faasalaga o le a feagai ai ma Kevan Darryl Salisbury
Puna o Faamatalaga: https://www.nzherald.co.nz/nz/long-standing-napier-drug-dealer-kevan-salisbury-admits-offering-to-sell-meth-and-party-drug-fantasy/Y5MKLJWHXRGSXNHB2KBVRRLGDQ/
