Ua ioeina nei e le alii o Kevan Darryl Salisbury i luma o le Faamasinoga Faaitumalo i Napier le 9 o ona moliaga, e aofia ai lona tuuina atu ma le ofaina o le faatauina atu o le pauta faasāina o le methamphetamine ma le pauta faasāina o le fantasy, faapea ai ma le moliaga o lona umiaina o se meafaigaluega na fausia lava e ia o le home-made taser.
I talaaga o lenei tagata; o Salisbury e lē fou i soligatulafono, o loo faamauina e tusa ai ma faamaumauga na amata mai lava gaioiga solitulafono a lenei alii i le tausaga e 2010, ina ua maua e leoleo mai se tasi o a latou galuega tele na maua ai le tasi o faleoloa mo laau totō e faapea e mafai ona aga’i atu iai tagata e faatau ai meafaigaluega e fesoasoani lea e totō ai laau faasāina o le mariuana.
I le tausaga lava lena e 2010, na faasala ai mo le 10 masina e nofo vaavaaia ai i le fale poo le home detention, ona o lona faaaogā ai o lona falefaigaluega ma lona fale e fai ma nofoaga e faatino ai le totōina o mariuana.
I le tausaga 2015 na falepuipui ai Salisbury mo le 2 tausaga ma le 2 masina i isi foi moliaga o le totōina o mariuana ma lona ofaina o le faatau atu o lea laau faasāina ma lona faaoolima ai i lana uo poo lona to’alua faapouliuli.
O moliaga na folasia i le mae’a ai ona faatino e leoleo o se latou sa’ili’iliga na faia i le fale a lē o loo molia ia Iulai o le 2015 na maua ai le 24 o laau faasāina.
Na maua foi faamaumauga i lana telefoni, o loo faailoa ai lona faatauina atu o ni suāuu e gaosi mai le mariuana i le tele o ana pa’aga o loo faatauina ia fualaau faasāina.
Ma e tusa ai ma lipoti a leoleo, o le latou iloa e lē o iai lava se tulaga e suia ai lenei tagata i le toe maua ai foi o faamaumauga ma faamatalaga na toe maua i lana telefoni ana gaioiga lava nei o le faatauina atu o laau faasāina; e pei ona faamau na amata faatino mai le amataga o lenei tausaga i le masina o Ianuari se’ia pā’ia mai le masina o Mati 2025.
Ma i le molia ai o Salisbury na ia ioeina uma moliaga ua folasia faasaga ia te ia.
O le masina o Oketopa o le a tolaulau ai le i’uga ma le faasalaga o le a feagai ai ma Kevan Darryl Salisbury.
Puna o Faamatalaga: https://www.nzherald.co.nz/nz/long-standing-napier-drug-dealer-kevan-salisbury-admits-offering-to-sell-meth-and-party-drug-fantasy/Y5MKLJWHXRGSXNHB2KBVRRLGDQ/
