O se mataupu ua leva ona faagasolo i le tulafono e faatatau i le togavao tele i le faaitu o Titirangi i Aukilani ua taunuu nei i sona taunuuga o le a faamamā ai le 3 ma le ‘afa hectares mo le fausia o se isi nofoaga fou mo le togafitia o le suavai.

O le taitaifono o le Titirangi Protection Group, Megan Fitter sa ia faamatala i le One News le lagona o le lē talitonu i le tulaga ua iai le mataupu aemaise ua atoa le fitu tausaga talu ai o finauina le faatumauina o le vaomatua.

Na faailoa foi e Fitter i lea lipoti o loo iai foi le popolega o tagata e nonofo i le faaitu lea i le aafiaga o lo latou pitonuu mai masini tetele aemaiise o le tele o auala sa faaleagaina i lologa.

O le faamatalaga mai le sui o le Watercare ua ta’ua ai o soo se poloketi tele lava faapea e iai lava le ituaiga gaioiga lea o loli ma masini mamafa ae o loo taumafai e faaitiitia lea tulaga.

Na ia ta’ua foi o le poloketi ua faataatia e tāua mo le sapalaia o le suavai ma o le a aogā foi mo tagata uma.

O le taimi nei la ua iai le poloketi i lona vaega amata ma ua fuafua e fā tausaga o le a tuai ai nai lo le taimi sa muai faatulagaina ai o lona uiga faatoa mae’a i le 2033.