O auala o fesoota’iga faaonaponei i le saoasaoa ma lelei o le initaneti e aunoa ma le alu alu pē, pe alu alu foi telegese pe motusia, o le manaoga lea o le Malo i se kamupani na te tapenaina lea auala o fesoota’iga mo fesoota’iga i le taimi o le Fono a Malo o le Taupulega ia Oketopa.

O le fono a le Kapeneta i le masina o Iulai na faai’ugafonoina ai le tuuina atu o le saunia o fesoota’iga televavave faaonaponei i le kamupani o le Vodafone Samoa i le tau e $513,219 tala.

O le faai’uga foi lea a le Kapeneta ua tuuina atu ai le faatagaga i le matagaluega o fesoota’iga ma faamatalaga faatekonolosi faapea le soākomiti o fesoota’iga poo le media and communications sub-committee a le malo, e faaaogā ai nisi kamupani tau initaneti e maua ai lea auaunaga, pe a iai ni faafitauli e ono tulai mai i le auaunaga a le kamupani ua manumalo lana ofo mo le faia o lea galuega.

O le tau o le konekarate ua maua e le Vodafone Samoa ua faamautu foi i le faai’uga a le Kapeneta le lē toe iai o nisi tau faaopoopo i se taimi mulimuli ane ai.