Ua i lima nei o leoleo se mataupu mai le vaega o le ofisa o le tiute o loo leoina o tatou tuaoi, o se tagata na malaga mai Amerika Samoa ma taunuu i le malaevaalele i Faleolo, ae maua ai o loo ia umia se tagapepa iila o loo iai le nakoti o le aisa ma se paipa e faaaogā i lea pauta faasāina.
E lē o faailoaina e le ofisa o le tiute pe fia le mamafa o le aisa sa i totonu o le tagapepa iila laitiiti, ae peitai o le taimi lava na maua ai i lea tagata malaga lea nakoti na taofia ai loa ma tuuina atu i leoleo mo su’esu’ega atili.
Faaalia e le Ofisa Sili o pulega o le Matāgaluega o Tiute ma Tupe Maua o loo faaauau pea ona mataalia le aufaigaluega o leoina o tatou tuaoi i malaevaalele ma uafu faavaomalo ina ia taofia le feavea’iina faasolitulafono o fuālaau faasāina, aemaise o le taofia o le ulufale mai ma oo atu i le lautele o le atunuu.
