E lei atoa se vaiaso talu ona aumai faalauaitele le logo a le matagaluega o le soifua maloloina i le faatāua o puipuiga o le faamai koviti 19 ma ia fai tuipuipui, ae aumai le lipoti lata mai a le soifua maloloina ua faailoa ai e toalua tagata ua faamauina ua maua i auga o le koviti.
Ua faailoa ai e le Faatonu Sili o lea matagaluega i se lipoti a le nusipepa o le Sunday Samoan, afai ae molimauina le toe faatupulaia o tagata e maua i auga o lea faama’i, o le a faatino loa se isi suiga i auala o puipuiga o le atunuu.
Ua faailoa ai foi e le Faatonu Sili Aoao le susuga Aiono Dr. Alec Ekeroma ua amata ona toe faamalosia le faia o siaki mo tagata e afea le auaunaga a le soifua maloloina i falemai autu faapea falemai faaitumalo.
O ia siaki o le faia lea o suega poo test e saili ai poo maua se tagata i auga o le Koviti-19.
O loo faamauina pea le aofaiga e 31 o ē na maliliu i Samoa ona o lea faama’i, talu mai le 3 tausaga ua tuanai na pesia ai le atunuu ma le lalolagi i le Koviti-19.
